教學个滋味
【徐佳妤/臺北市支援教師】
發音人:徐佳妤(南四縣腔)
【滋味之一】
第一擺堵着學生仔,因為聽毋識客話就目珠紅紅!
同曩擺共樣,帶等六年生个同學來練習課文後背个「學習評量」,全部都係選擇題。一起勢,𠊎放送音檔,今嘎个學生仔蓋壁,就算聽毋識,淨看字還係做得箍出正確个答案。故所,𠊎愛佢等將課本合起來,淨用耳公聽,過分每一個人細白板、筆,「看自家寫著幾多題,無算分數……」𠊎講。
下課時節,伸一隻學生仔還坐在位仔項,看佢目珠紅紅,行前問原因。「先生,頭先个音檔講麼个,𠊎都聽毋識……」「毋怕,對臺北市个學生仔來講,聽毋識係正常个。若屋下有麼人係客人?」𠊎問。「阿公。」「阿公有同你講客無?」「無,阿公都講華語。」「啊你有同阿公講客無?」「無。」「你歸去愛『主動』同阿公講,佢聽着你講客,就會應你客話,毋曉講个,就用華語問阿公,阿公教你,你就記起來。」
黏時,𠊎放一段,坐高鐵下車進前會聽着个客話音檔。欸,毋會㜮(lamˊ)哦!學生仔聽得識三到四個站名,就鼓勵佢:「在日常生活肚,坐大眾運輸工具,愛打開耳公去聽客話,有閒多看客語節目,還有上哈客網路學院。」 這下𠊎正愐起,佢蓋像係六年生正開始來學客,會忒慢無?一息仔都毋會,為了這恁有「心」个學生仔,𠊎想:愛放慢教學速度咧。
【滋味之二】
這學期𠊎無再做名條,請中、高年級个學生仔一入教室,就自家寫客語拼音个名仔在粉牌項,上課表現好,𠊎會在厥名仔脣口加分,一學期下來,學生仔定著會記得自家名仔个客語拼音。
看著粉牌項个名仔,有个寫到正正、有个潦草、有个細細隻、有个大嫲隻,淨看字,就知該細人仔个性體。無想着,一個三年生个細阿妹仔送教師節卡片分𠊎,頂項寫等:「感謝先生,分𠊎知得自家名仔个客語拼音。」今年係𠊎第一擺教佢,正經又感動又歡喜。
在教學現場-酸、甜、苦、辣,只有自家經歷過,正知其中个滋味啊。