伊利諾大學橫跨兩個小城:香檳(Champaign)同厄白那(Urbana),故所全名安到「伊利諾大學香檳校區」(University of Illinois at Urbana-Champaign)。這兩個小城人口都毋多,生活機能多少同學校个五六萬來自全世界各角落个學生關係密切,係嶄蠻典型个大學城。當地民風崇尚自然簡樸,大部分農民種包粟過日仔,上教堂祀奉上帝,保有相對成分个清教徒傳統,對學生仔相當友善。
香檳个初秋,天空清澄湛藍,陽光晶瑩透亮,正實有詩意有夢境。行啊在綠油油个草坪項,清風迎面吹來,還有刺骨个涼意,盡像台灣个初冬,毋過可能係燥乾个關係,並毋會有冰冷个寒意,顛倒有息把放鬆个歡喜。校園个樹葉吂變色,綠葉還在,繁多个葉仔在秋風中咻咻滾,十足雪萊(P. S. Shelly)「西風頌」(Ode to the West Wind)个情懷,又像「秋聲賦」个寂寥,有一息落寞,有一息孤單,還有一息滿足。𠊎一個人定定仔行啊在他鄉个秋風中,想愛去追求未來个遠景,想愛去圓滿從細到今个美夢,完全毋知面前个苦難同夢魘。
繞過中庭,眼前就係FLB (Foreign Language Building)大樓,裡肚有𠊎未來全部个生活空間,未來个夢想。遠遠看啊去,該棟建築並無麼个特別,烏亮烏亮个玻璃纖維窗門,在日頭下𥍉啊𥍉仔,又晟眼又得人惱,完全係現代建築,冷冷个表情,孤獨个堅持。有造型,有風格,缺少个就係溫暖,毋像隔壁該間矮屋仔,庭樹古老,壁上爬滿藤絲,一幅經過滄桑歲月个影跡,該係出過Leonard Bloomfield等大師級語言學家个人類學庭院。