【文/黃元姜 (國立中央大學客家語文研究所研二生)】
四年正一擺个「奧運」開幕囉!!
今年个奧運比賽來到北京,分大家當期待今年个比賽,尤其係佢兜个比賽場地,鳥巢、水立方兩隻所在,還較響人。逐屆奧運个比賽个項目有當多種,無論係泅水、棒球、籃球、走相躩抑係跆拳道、跳水,逐個運動就異好看。毋過今年較特殊就係台灣个蘇麗文。
蘇麗文,雖然毋得名,大家盡記得就係佢堅持、奮戰精神;在第一場比賽因為腳傷失去得到金牌个機會,毋過,佢無放棄、無失志,還係打進銅牌賽;有看个朋友,定著佬涯共樣,目汁緊跌,因為腳受傷个佢,毋放棄任何做得贏个機會,就算腳仰般痛、仰般跌倒還係愛拚下去,毋到最後一秒鐘,絕對做毋得放棄。
這下个社會愛尋到向蘇麗文恁仰个細妹無多咧,有个正係跌到地泥會爛著个草莓族、毋就係等等頭路上門个後生人。好在,現下社會還有像蘇麗文恁仰个人,其煞猛無放棄个精神超過金牌分人个意義。
贏个味續係短暫个,「過程」續留分恩俚一生人个回憶。