【文／彭瑞珠 (國立中央大學客家語文研究所研一生)】
農曆九月，係柿仔黃熟个時節。
雙十節个日，同學大家佇新竹个新埔做調查。捱對桃園駛車子下去送涼水：行北二高到關西交流道下，再行縣118道路，直直駛，經過關西，就會到新埔。會到新埔个路脣，就看得到幾下間柿仔工廠佇个做柿餅。
个日，「九降風」當透，日頭當剌，捱想今年个柿餅一定好食。黃蠟蠟个柿仔，實在遐人，忍不住就先買一盒食起來了：同捱想个共樣，今年个柿餅有韌又有甜，一息仔就不會澀﹝舊年可能買太早，柿仔吂有熟，有一息仔澀﹞，亦有香，可惜價錢有起兜仔。不過，有食到柿餅，秋天个色水正有滿，還係分捱感覺到當心爽。
做細人仔時節，屋脣有一頭當大頭个柿仔樹。个係嫁公个柿仔樹，柿仔係冇分風搓打忒，大家就有好食。樹仔太高，柿仔難摘：阿舅會拿撈仔湊到竹篙尾，勾啊去，不使上樹，柿仔就會跌到撈仔肚，一年摘一擺，也有幾下籮。嫁婆會用大醃缸浸柿仔，畀出澀水：柿仔放入大醃缸肚，裝水，搥幾粒柿仔做柿瞻，摘一帕牛眼樹葉蓋等，澀水出盡，就有脆脆甜甜个柿仔好食哩！
卡紅个柿仔，係阿姑婆盡中意个。佢會對柿仔个楴頭項點一息仔碱(ㄍ丨ˊ)，囥到放榖殼个醃缸肚，紅透哩，就係佢盡好个，軟入入仔个紅柿了！
有時，細哥佢兜，會用布袋裝柿仔，埋到屋面前細河壩个沙仔肚，畀走澀水。有一年，柿仔埋好，還來風搓，雖然河壩脣个田冇上水，細哥个柿仔煞分水打淨淨。好得嫁婆卡精，醃缸肚个柿仔不會分水打走。
今這下，柿仔樹因為開路倒忒哩！要食柿仔要用買哩！不過，柿仔對捱來講還係秋天一定要有个黃蠟蠟个色水。
啊！秋天有柿仔个色水，真好！
