【文／黃元姜 (國立中央大學客家語文研究所研二生)】
『大廈千間夜眠八尺』，係講啊，人莫貪，對任何事情一定愛有知足、滿足个心。毋過，有幾多儕聽吔落去？有幾儕看得開？
前幾年，全球金融不景氣連帶影響著台灣个經濟。經濟毋好，連帶老百姓無辦法生活、社會福利機構、弱勢團體還較慘，無人捐款，生活過著異辛苦。該央時，政府就開始想辦法做得來改善這種狀況無？政府就學美國、英國用樂透彩券个方式，一注五十个銀、每一儕人就做得買，做得無限制个買，著著个人，有一部份愛拿來納稅，賸个就看自家愛仰般來用。
有一擺，就聽著隔壁鄰舍阿名哥著著特獎。阿名哥係建築工地个工人，頭路無幾穩定，三不二時換工地做，屋家又有爺㧯娘子兒愛照顧，生活負擔抑異重。因爭下班時節，行過彩券行，想試看啊，看做得改善生活環境，分一家好個生活無。就買吔一百銀試看啊。毋想著，正經著著幾下億。這擺著著獎，係一个好消息，做得分屋家人好生活囉。領著獎過後，佢出入有轎車好駛、歇又靚又大个農莊，也盡命个使錢，無幾年，著著獎个錢就用忒咧。這下，屋仔賣忒、車仔賣忒，生活又轉著以前个生活。後來，正知，因爭交著酒肉朋友，看著佢著著恁多錢，就盡命仔喊佢出錢，無單自家錢使淨淨，還去借錢。今下，又轉著工地去做頭路。
「良田萬傾，日食一斗；大廈千間，夜眠八尺。」台塑經營之神王永慶先生，最分人遽常哦腦就係，佢為慈善事業捐咧25
億元，係臺灣歷史上捐款行善最多个企業家。雖然賺吔恁多錢，毋過佢當知足，還遽常捐錢、捐助聽器分慈善團體。因爭佢遽常做善事，使得身體康健，無煩惱，食著九十二歲，正經就係「心知足就係富，胸納萬物就係貴。」
毋管景氣好與壞，愛曉得想；今下恩俚有屋仔好待、有衫褲有著、有頭路好做、有飯好食，就愛知足囉。
